Rahis «Празь Сеціва»

Максі-сынгл «Празь Сеціва» з чатырох песень — першая студыйная праца Rahis, якая па-новаму прэзэнтуе вядомы раней пераважна па канцэртах, кватэрніках і акустычных «хатняй» якасьці запісах гурт.

Rahis нарадзіўся яшчэ ў студэнцкія гады ў Беларускім дзяржаўным пэдагагічным унівэрсытэце на факультэце прыродазнаўства, але хлопцы аніяк не падобныя на магчымыя ўяўленьні пра батанікаў. Правакацыйным канцэртам «Тры гады ўстрыманьня» восеньню 2007 году Rahis прэзэнтаваў электрычную праграму, пакінуўшы акустыку ў фармаце unplugged, а ў 2008-м пачалася праца над студыйным запісам. Максі-сынгл «Празь Сеціва» — знаёмства з сучасным Rahis напярэдадні першага альбому гурта.

«Песьні ў максі-сынгле — гэта ня выклік і ня даніна часу, не адказ на ўсе пытаньні. Гэта зрэз твораў да будучага альбому. Яны ня лепшыя і ня горшыя за тыя, што будуць у альбоме, проста запісаліся хутчэй за астатнія.

Можна сказаць, няма тут ніякай адмысловай канцэпцыі і стылёвай аднастайнасці, і ў гэтым, на наш погляд, няма нічога страшнага. У нашай краіне створаны, напэўна, ідэальныя ўмовы для творчасьці — грошай у музбізнэсе мізэр. Рабі што хочаш, як хочаш, для каго хочаш — поўная свабода творчасьці, пра што ўвесь час кажуць маладыя й немаладыя музыкі. Адныя пішуць пад радыё, іншыя — для карпаратываў, некаторыя аматары — для чартаў, мы пішам песьні для сяброў і пад іх моцным уплывам.

Самі песьні моцна зьмяніліся ў часе запісу, атрымалася што бардаўскі, канцэртны й студыйны варыянты моцна розьняцца. Людзі, якія чулі нашы песьні раней пад гітару, могуць не пазнаць іх, але хацелася б усё ж такі паказаць зробленае ў як мага больш выгодным сьвятле».

Rahis